حوار صحفى مع رجل المستحيل

المكان:
أحد ابقاع النائية في العالم
الموقف:
سبعة جيوش من دول مختلفة تطارد أدهم صبري .. النيران و القذائف تحيطه من كل جانب ، و القناصة و المدرعات و الطائرات تطارده ومهمتهم الوحيدة هي القضاء عليه لأنه عامل لهم وجع دماغ زيادة عن اللزوم
أدهم صبري يحتمي بجدار شبه متهدم و يعيد حشو (الآر بي جي) الخاص به .. في هذه اللحظه جاءت فرصتي لإجراء حوار انفرادي معه

أنا: بنرحب بيك يا أستاذ أدهم
أدهم: أهلا بيك
أنا: قصصك في معرض الكتاب بتحقق مبيعات هايلة بين الشباب.. تفتكر ليه ؟
أدهم: يمكن عشان بيحبوا يعيشوا العالم ده.. لكن أنا نفسي مش عارف ليه بصراحة
أنا: لما بتروح معرض الكتاب بتشتري ايه ؟
أدهم: اي حاجة غير القصص بتاعتي
أنا: إنت مصري صميم و بتكلمني دلوقتي بالعامية.. أمال ليه بتتكلم باللغة العربية الفصحي في قصصك ؟
أدهم: أنا باتكلم بالعامية طبعا لكن باتكلم بالفصحى عشان شغل قصص بقى.. مانت فاهم
أنا: ما هي هواياتك ؟
أدهم: إني اطارد عملاء الموساد و أبوظ عملياتهم.. واعكنن على أجهزة المخابرات المعادية.. و المهم طبعا إني أبسط القراء..عن إذنك
و انحنى ليتفادى طلقة مدفع و انهال بوابل من الرصاص لينسف دبابة و يعود لحشو الكلاشينكوف الخاص به
أنا: ماذا تفعل في وقت فراغك؟
أدهم: ماظنش إن كان عندي وقت فراغ أساسا.. إنت مش شايف ؟؟
أنا: ماهي أكلتك المفضلة ؟ المنسف ؟
أدهم: لأ.. باحب الفول و الطعمية
أنا: طيب.. من هو مطربك المفضل ؟
أدهم: عاجباني جدا أغنية ( ماتقولش إيه و ازاي وليه؟) بتاعة فيلم مافيا, إللي غناها مدحت صالح.. لأنها بنتطبق على كل حاجه بتحصل عندنا.. مش هاتفهم حاجة
أنا: يقال انك ماتجوزتش لحد دلوقتي عشان لسه بتجهز نفسك زي الشباب المصري.. ماذا تقول ؟
أدهم: لأ الموضوع مش كده خالص.. كل الموضوع إني لسه باسد الخروم بتاعة الرصاص إللي في جسمي
أنا: بيجيلك ايميلات من المعجبات؟ وبترد عليها ازاي؟
أدهم: عندي ايميل فعلا.. و بيجيلي ايميلات كتير من المعجبات.. لكن باحاول أفوّقهم و اقول لهم إني مش شخصية حقيقية و إني شخصية روائية وأقنعهم نهم صعب يلاقوا حد بالشكل ده..كانت منى أشطر
أنا: لما تعمل فرحك على (منى) هاتعزم مين؟
أدهم: هاعزم قدري خبير التزييف صاحبي.. لكن المهم أعزم سونيا جراهام إللي بتحبني عشان أغيظها
أنا: بتروح فين في الاجازة ؟
أدهم: أنهي أجازة ؟
أنا: من الملاحظ إن إنت دايما لابس بدلة زرقاء مع كرافته حمراء.. ليه ؟ و مافكرتش تلبس كاجوال ؟
أدهم: بالبس كاجوال طبعا.. لكن الرسام مش بيرسمني بيها
أنا: بتخرج فين مع شلتك ؟؟
أدهم: ماليش شلة.. هم منى و قدري ماليش صحاب غيرهم.. باروح معاهم مغامرة مثلا.. نطارد حد.. نهرب من مطاردة حد.. هي دي التسلية بتاعتنا
أنا: ايه نوع الموبايل بتاعك ؟
أدهم: مش باستخدم موبايل لكن باستخدم أجهزة أكثر تطورا.. لو استخدمت موبايل مش هاعرف أشتغل من كتر ( الميسد كولز ) اللي هاتجيلي.. تخيل كده واحد الموساد تديله (ميسد كول) ؟ ماينفعش طبعا
أنا: إيه علاقتك بمؤلفك د. نبيل فاروق ؟
أدهم: أعرفه من بعيد, لكن باقرا إسمه على القصص بتاعتي.. بيحصل بيننا مشاكل كتير طبعا لأنه كل شوية يموّتني و يدوخني.. ممرمطني معاه و الله الراجل ده
أنا: جبت كام في الثانوية العامة ؟
أدهم: بيني و بينك ماجبتش مجموع طب ولا هندسة بصراحة


أنا: نصيحتك إيه للشباب اللي عايز يبقى ضابط مخابرات جامد زيك ؟
أدهم: أكتر حاجة بتضحكني لما بيجيلي شاب صغير يقوللي: عايز أكون ضابط مخابرات ! دي عملية صعبة جداً.. أهم حاجة انك تركز تكون انسان ناجح
أنا: تعرف رأفت الهجان و جمعة الشوان (كزملاء مهنة) و بتقعدوا عالقهوة مع بعض و كده؟
أدهم: دول مش زملاء مهنة دول تلاميذ مهنة.. لأنهم عملاء بس مش ضباط مخابرات محترفين.. عملوا خدمات جليلة للوطن طبعا لكن مش زملاء مهنة.. مش ضباط مخابرات
أنا: هل هاتستمر و لا لأ ؟
أدهم: فيه عقبات بتواجهني حاليا لكن مش عارف هاستمر و لا لأ.. أنا ناوي لكن مش عارف الحياة ناوية و لا لأ
أنا: هل لديك أقوال أخرى ؟
أدهم: أقر بكل ما جاء في هذا التحقيق
أنا: شكرا يا أستاذ أدهم
ابتسم ابتسامة واثقة و أجاب: العفو
و استدار على عقبيه في مرونة فائقة ليلكم أحد المقاتلين في وجهه.. و اعتدل ليواجه الجيوش وحده في بسالة
لأنه الرجل
رجل المستحيل

رجل المستحيل

بالطبع أغلبنا يعرف سلسلة رجل المستحيل من تأليف دكتور نبيل فاروق ، اليوم جاءتنى رسالة بالبريد الاليكترونى تسخر من رجل المستحيل ومن مغامراته ، وبصراحة الرسالة دمها خفيف جدا جدا .
ولكن اذا كنا نقبل مايقوم به فان دام وستيفن سيجال وجيت لى وأرنولد وغيرهم فى الأفلام الأمريكية فلماذا لا نقبل هذا فى عمل محلى ، وجميع هذه الأعمال تقوم على فكرة البطل الذى لايقهر ويتحدى كل الصعاب .
عموما اليكم الرسالة لتستمتعوا بها
واليكم ايضا رابط يضم أغلب أعداد سلسلة رجل المستحيل

رجل المستحيل

أدهم صبرى ضابط مخابرات مصرى جامد، داخل ع الستين من عمره، يرمز له بالرمز ب-516 ، حرف الباء يعنى أنه من بولاق، أما الرقم 516 فده رقم الأتوبيس اللى بيركبه عشان يوصل محطة البحوث ومنها يوصل لرمسيس يغير المترو عشان ينزل محطة القبة بتاعة المخابرات.هذا لأن أدهم رجل من نوع خاص حيث أنه يجيد قيادة كل أنواع المواصلات من الطائرات والغواصات والسوبرجيت حتى التوك توك،ويجيد استخدام جميع أنواع الأسلحة من المسدس وبمب العيد حتى القنابل النووية والهيدروجينية، ويجيد 66 لغة بالصلا ع النبى وفيه لغتين اتعلمهم وهوه نايم،ويجيد جميع أنواع التنكر، وجميع أنواع القتال والألعاب من التايكوندو وحتى عريس وعروسةلقد أجمع الكل ومنهم أنا أنه من المستحيل وربنا أن يجيد رجل واحد فى عمر جدى كل هذه المهارات ولذلك استحق هذا اللقب .. رجل المستحيل

اختطاف محسن

المغامرة رقم 65468

ازاى الكلام ده؟؟

جلس مدير المخابرات الجديد على مكتبه وهو يتذكر ماحدث حتى الآن فى هذا الأمر الصعب الذى تمر به مصر وما حدث من أدهم (لمزيد من التفاصيل راجع العدد السابق65467 الجزء التاسع من المغامرة بعنوان"قال عايزين يخطفوا محسن")وبعد قليل طرق أدهم الباب فأذن له بالدخول واستنشق بعض الأكسجين من الهواء فالإنسان لابد أن يستنشق الأكسجين حقيقة علميةوقال لأدهم الأمر اتأزم جدا يا ب-516،نص محافظات مصر مش لاقية تشرب مية والناس خرجت بالجراكن وعاملين ثورة اسمها ثورة الخراطيم، كل واحد جاى بالخرطوم وهيقطعنا.. والقيادة العليا بتشك فى إن ده ملعوب من المخابرات المعادية الإسـ...(لا لا مش الإسرائيلية) وكمان التقارير بتقول ان سونيا جراهام هنا

يغضب أدهم ويقول يبقى جه الوقت اللى هاقدر آخد ابنى الرضيع منها، يرد المدير رضيع إيه يا أدهم؟؟ ابنك زمانه قدى دلوقتى .. دانت سايبه فى العدد 100 ،وبعدين هما عملوا حاجة عشان انت اللى تقوم بالعملية تحديدا..يرد أدهم عااااارف عاااارف .. أكيد خطفوا قدرى .. يافندم الراجل ده اتخطف أكتر ما زور جوازات .. يرد المدير دى تذكرة الطيارة اللى هتسافر للمنصورة بعد 3 ثوانى عشان مفيش مية هناك فى نص المراكز..الحق غير هدومك وزور قرايبك ع السريع والحق الطيارة.. أخذ أدهم التذاكر وهو ينظر إليه جامد

جامد

جامد

جامد

************

ينفع كده ؟؟؟

هبط أدهم من الطائرة فى المنصورة متنكرا فى شكل طفل فى رابعة إبتدائى وأشار إلى توك توك وهو يلاحظ السيارات التى تراقبه وفهم فورا بذكائه ازاى العصابة عرفته رغم التنكر فقد أخطأ وقال لسواق التاكسى أحلى صباح فعرفوا علطول انه أدهم عشان قال حرفين الألف والصاد المشهور بيهم..المهم رمى أدهم سواق التوك توك وتسلم مقعد القيادة وتذكر كيف أن أبوه فى الخمسينيات علمه كيف يقود التوك توك عشان يبقى أحسن ظابط مخابرات، انحرف أدهم فى حتة ضلمة وانحرفت العصابة وظهر أدهم للعصابة فخرج من السيارة 100 شخص مسلحين ولكن أدهم أخرج مسدسه أبو 6 طلقات وضرب رشاشاتهم كلهم من غير ما يجرح واحد فيهم وبعدين للأسف المسدس معدش فيه رصاص ولكن أدهم رجل المواقف الصعبة دور الضرب فى الرجالة .. ففقد 65 واحد الوعى ولكن التانين فهموا الخدعة فعملوا دايرة حول أدهم ولكن أدهم طار فى الجو ونزل عليهم كلهم .. وفى لحظة وصلت إمدادات العدو كمان200 واحد .. ولكن أدهم ضربهم كلهم برضه ووصلت الإمدادات التانية حوالى 500 واحد كمان ولكن الكثرة تغلب الشجاعة .. يعنى حوالى 800 واحد على واحد كتير برضه

وفقد أدهم الوعى أمام عدوه اللدود

الفظيع

الشنيع

المريع

************

والله ما يحصل

أفاق أدهم فوجد نفسه فى مخزن وبجانبه المحروس قدرى كالعادة مربوط..وأمامهما سونيا جراهام ست زى القمر فقال لها أدهم إيه الحلاوة دى يا سونيا؟؟ انت كل ما تكبرى تحلوى؟؟ ترد سونيا مش أحسن منك ياللى مش بتكبر أصلا!! يتمتم أدهم ياللنسااااء

ويسألها: ليه انتوا قطعتوا المية عن نص البلد والناس مش لاقية تشرب وبتشرب مية المجارى والناس مش عارفه تغسل وبيغسلوا هدومهم فى الترعة؟؟

تقول سونيا عشان الشعب يفتكر ظلما ان الحكومة بتاعتكم هيه اللى عاملة كده؟

أدهم بفضول :يعنى بجد والله الحكومة مالهاش ذنب؟

ترد سونيا : لا طبعا .. حكومتكم أحسن حكومة دلوقتى ..الشباب كلهم بيشتغلوا.. الجنيه بقى أغلى م الدولار .. الأسعار نزلت ..الانترنت بقى ببلاش فى البيوت.. ما فيش حاجة بتتباع فى البلد.. بنك القاهرة ما اتباعش ولا عمر افندى..الفضيلة انتشرت فى البلد ولغوا كل القنوات اللى بتتحدى الملل.. المية واصلة للبلد كلها والمواسير بقالها 200 سنة عشان المحافظة ع التراث.. انتوا اللى شعب غلباوى

غلباوى

غلباوى


************

ما تلمى نفسك بقى

قطع أدهم قيوده فجأة وماتسألش ازاى (آه نسينا نقول فى المقدمة انه يجيد التخلص من كل القيود فى الدنيا)وصفع سونيا جامد يعنى ولكن الحارس جه من وراه وضربه ولكن منى(اللى أصلا عندها كام وخمسين سنة) جت فجأة مش عارفين منين وضربت الحارس من وراه وأنقذت الموقف .. نظر أدهم فى عين منى وقال لها تتجوزينى؟؟ ترد منى فى حياء: ماينفعش يا أدهم عشان أنا جسمى كله واوا .. يغضب أدهم ويخرج من المكان بعد أن حرر قدرى وهوه يغنى ليك الواوا ..بوس الواوا..خللى الواوا يصح

وهو فى الطريق ينحرف الجميع إلى أقرب بيت ويطلب منه أدهم بعض الماء للشرب.. ولكن صاحب البيت الحاج بيومى يخرج بمقشة هوه وعياله ويحتجزون أدهم ورفاقه وهو يصرخ: زى ما العصابة خطفت محسن ابنى، أنا كمان هاخطفكم، وبعدين انتوا جايين تطلبوا مية ؟؟ هوه فيه مية فى البلد ياولاد الكلب

..الكلب

..الكلب

..الكلب

انتهى الجزء التاسع

العدد القادم

(لسة خاطفين محسن)

كيف يخرج أدهم ورفاقه من بيت الحاج بيومى؟

كيف يستطيع أدهم بعد كل هذه الصعاب أن يحصل على كوز مية عشان يشرب ؟

هل يستطيع أدهم أن يحرر محسن ابن الحاج بيومى وللا هيسيبه يتحرق؟

سيب اللى ف إيدك .. وقاتل بإيدك ورجلك وكبدك مع رجل المستحيل

النهاردة السبت ولا الاتنين

حاجة تحير

امبارح الجمعة ، يعنى المفروض النهاردة السبت ، شىء بديهى مش محتاج حسبة ، لكن الغريب انى وانا باتصفح اخبار اليوم على الانترنت فوجئت ان النهاردة الاتنين !!!
جايز اكون تهت او سرحت او نمت اليومين دول ، بس المعقول لو النهاردة الاتنين يبقى التاريخ 13 أكتوبر ، لكن يبقى الاتنين وبرضه 11 أكتوبر طيب تيجى ازاى ؟!!
يمكن الحكومة غيرت أيام الاسبوع ؟؟؟
كل شى ء جايز
بس شوفوا الصورة

النصائح البسيطة لكل فتاة عبيطة

العبط فى لغتنا هو السذاجة أو قلة العقل أو الهبل أو الحمق
و هذه أعراض قد تصيب بنى آدم على نوعيهم
فقد يصاب بها الرجل و قد تصاب بها المرأة
و لكنها حينما تصيب المرأة تصبح أمراً خطيراً يحدث لها على إثره ما لا يحمد عقباه
فالفتاة العبيطة وبال على نفسها و على أهلها ، و هى و إن كانت عبيطة فإنها غير معذورة فالعبط عكس الجنون
حيث أن الجنون مرض مثل سائر الأمراض يعذر به صاحبه لأنه لا يد له فيه
أما العبط فهو أمر يسهل على الإنسان أن يقي منه نفسه بمزيد من التعلم و التربية و التدريب و التدين
و الكلام اليوم موجه إلى الفتاة العبيطة خفيفة العقل و الدين التى تجر على نفسها المشكلات التى كانت فى غنى عنها لو أنها تمسكت بدينها و عصمت نفسها بأخلاقه القويمة
و لكى أكون عملياً سوف أعدد بعض المواقف التى تقع فيها الفتاة و تستحق بها عن جدارة و استحقاق لقب ( عبيطة )
1- حينما تفتح قلبها لأى امرأة لا تعرفها و تحكى لها أدق تفاصيل حياتها من أول مرة تلقاها فيها فتجد نفسك فى مترو الأنفاق ممكن تسمع هذا الحوار بين امرأتين لقيا بعضهما لأول مرة منذ خمس دقائق " بقالى خمس سنين متجوزة بس ما خلفتش و بينى و بينك العيب مش منى ده من جوزى اصل و هو صغير وقع على ضهره .... "
2- حينما يرتفع صوتها فى الكلام أو الضحك أمام الناس : فمن الممكن أن تكون جالساً فى مكان فتسمع صوتاً تحسبه سارينة الحريق فإذا بك تفاجئ أنه صوت امراة تضحك
3- حينما تلبس ملابس غير محتشمة ليس على سبيل قلة الأدب و لكن على سبيل الحمق و التقليد الأعمى : فقد تجد فتاة سمينة جداً ترتدى بنطالاً من الجينز الشديد الضيق مما يجعلها تبدو مثل شوال البطاطس
4- حينما تضيع عمرها و وقتها فى ما لا يفيد كالكلام فى التليفون أو المكث بالساعات أمام التليفزيون أو الكلام فى الهاتف أو بتضييع الساعات أمام المحلات و الفاترينات لأجل أن تشترى توكة بربع جنيه
5- حينما يأتيها ابن الحلال الطيب المناسب فترفض بغرض إكمال تعليمها ( بكالوريوس خدمة اجتماعية أو معهد تعاون ) لأن الشهادة سلاح فى يد المرأة ثم فى النهاية تأخذ هذا السلاح و تبله و تشرب ميته
6- حينما تعطى أذنها لكل من هب و دب حتى لبائعة الجرجير .
7- حينما تكون شخصيتها ضعيفة تترك قيادها لأى إنسان طيب أو شرير
8- حينما تكون خفيفة غير متزنة تضحك لأتفه الأمور و ترقع بالصوت لأنها رأت خصلة من شعرها على السجادة ثم تقول بعد أن تهدأ : أصل بحسبها صرصار .
9- حينما تترك الجهل يعشش فى خلايا مخها و لا تحاول تثقيف نفسها لا دينياً و لا دنيوياً فهى لا تعرف أى شيء فى أى شيء و قد يكون الحمار و لا مؤاخذة مثقفاً عنها
10- حينما يكون أكبر همها هو الزينة و اللباس
11- حينما تصدق كلام شاب يسرح بها و يفهمها أنه يحبها و خاصة إن كان زميلها فى الكلية ، فى حين أن كل شاب يأنف أن يرتبط جديا بفتاة أخذ منها معظم ما يريد فتصدق حتى من يقول لها : أنا باحبك يا انشراح و بعد أربع سنين لما أتخرج حاشتغل و أحوش و أعمل مشروع و آجى لبابا أخطبك و أنا إيدى مليانة المهم دلوقتى تعالى نروح الجنينة اللى تحت الكوبرى "
12- حينما تترك نفسها للشيطان و تتزوج عرفياً فتضيع نفسها و تحطم أهلها
13- حينما تسرح على المنتديات و تقضى فراغها بالدخول فى المواقع التى تخاطب فيها شباباً من باب تضييع الوقت ثم يحدث ما لا يحمد عقباه
14- حينما تطلب من عريسها ما ليس فى وسعه و تكلفه فوق طاقته ( كاتشين ماشين – غسالة أطباق – نجف – ستاير– خلاط مستر براون – دباديب كتير – ميكروويف– ديب فريزر - كورن فيليكس – شيش طاووك !!!!!!!! ) و ممكن يكون فى بيت أبوها معندهومش بوتاجاز أصلاً
15- حينما تعتبر نفسها نداً لزوجها و أن رأسها برأسه و أننا نعيش فى عصر المساواة و حرية المرأة إلى آخر هذا الكلام العبيط فتقول له : أنا سمعت امبارح فى البيت بيتك إن أنا زيي زيك و أنك مش أحسن منى ، و من هنا ورايح أنا حاغسل المواعين يوم و إنت تغسلها يوم
16- حينما تنقلب حياتها رأساً على عقب لما ترى حلماً عبيطاً مثلها لأنها تظن أنها شفافة و أحلامها دائمة التحقيق فتقول لزوجها مثلاً : أنا حلمت إنك بتخونى مع الشغالة لازم تطلقنى ، مع إنهم معندهومش شغالة أصلاً
17- حينما تؤكد أن كل صداع يصيبها أو دوخة ما هى إلا عمل و جن و لبس و سحر فتجبر زوجها على أن يذهب بها إلى الشيخة سمحانة أو الشيخ الزغربانى اللى سره باته
18- حينما تقيم الدنيا و لا تقعدها إذا تأخر حملها أسبوعاً كاملاً بعد زواجها (بكاء – هيستريا - تحاليل + أشعة + دكاترة + ... إلخ )
19- حينما تحكى كل شيء عن بيتها لأمها و أختها و صديقتها : بخيل و جلدة و مش راضى يشتريلى فستان بمناسبة عيد العمال
20- حينما تصاب بالغيرة العمياء و تشكك فى كل قول و فعل لزوجها : طلقنى ...أنا شوفتك بعنيى بتتكلم مع الولية بتاعة العيش و بتضحكلها ليه ، مع أنها امرأة عمياء كسيحة تجاوزت الثمانين
21- حينما تتبسط لدى أقاربها الرجال من غير المحارم ( إبن خالة ماما – إبن عمى – إبن خالتى – جارنا القديم – زميلى لما كنا فى الجامعة ) متبقاش معقد كدة خليك لارج
22- حينما تهمل فى أولادها لصالح عملها ( لازم اثبت ذاتى فى الشغل )
23- حينما تصاب بداء التطير و الخوف من الحسد إلى درجة المرض فتقول : القطة السودة عدت من قدام باب الشقة يبقى نهارنا إسود مفيش خروج النهاردة
24- حينما يكون ( من سيغنى فى فرحها ) أهم عندها من العريس نفسه ، أى واحد و خلاص ، لازم تجيبلى المطرب العاطفى ( نبيل عضمة ) يا إما كده يا إما مفيش جواز ، الواحدة متتجوزش أحسن ما يتعمل لها فرح أى كلام
25- حينما تكد و تتعب فى عملها ثم تعطى ما قبضته للحضانة و المربية
26- حينما تتزين خارج بيتها و تتعفن داخله
27- حينما ترفع صوتها على زوجها و تغضبه
28- حينما تتوقف عن تطوير نفسها و تتحجج بانشغالها بالأولاد
29- حينما تجعل البيت سيركا و لا توفر لزوجها سبل الراحة فيه
30- حينما تكون مسرفة مبذرة
31- حينما تقارن نفسها بالأغنى منها مالاً لا بالأتقى و الأعلم و الأكثر تدينا و خلقا
------------ --
تلك ثلاثون كاملة و ازدادت واحدة و الأمر أكبر من ذلك
فحصنى نفسك أيتها الفتاة من أن يصيبك هذا الداء العضال الذى أعيا من يداويه و هو داء الحمق و العبط

نقلا عن نور اسلامنا