مرة اخرى مع الشيخ أمين الديب وحوار له مع بوش ، وللأسف القصيدة غير مكتملة وأرجو من لديه القصيدة كاملة أن يرسلها إلى
قمت اتعدلت فى قعدتى
وعدلت شالى وعمتى
وقلت له :
الفلاحين ناس طيبين
عايشين على فيض الكريم
واللى يجود بيه ربنا
ورغيف نباتى فى زرعنا
بنأكله عيالنا لقم
بعرق وطين
ناس شغالين
وكلامنا دغرى
لا فيه شمال
ولا فيه يمين
والكلمة فوق طرف اللسان من قلبنا
والحب ساكن قلبنا
وبعقلنا ناس مؤمنين
والكلمة واحدة عندنا
ولا عندنا شىء م الخباثة
ولا كلمة للناس كلها
ولا كلمة لبتوع السياسة
اسمع يا بوش
أصل الحكاية كلها
الكيل طفح
والناس بتسأل انتو فين ؟
وازاى تكيلوا بمكيالين ؟
وأخوك شارون
ساق فى الجنون
ماتآخذونيش يقتل عيال ؟!!
هما العيال يعنى الصغار مش أبرياء ؟!!
ولا العجايز والنساء مش أبرياء ؟!!!
ويغشكم ويقولكم
الارهاب بتاعهم عالمى
ويروح يدمر عندكم
مركز تجارى عالمى
ويروح يهد البنتاجون
أقسم يمين له دخل فيه
بقى مش جنون
يضربكوا ليه ؟!!
طب قصده ايه ؟!!
وتقولوا بن لادن ضربنا وهزنا
ضيع هيبتنا وهدنا
أحلف بكل الأنبيا وبربنا
الضربة دى من عندكم
وبعلمكم
وبالخصوص السى آى ايه
معرفش ليه
للمسلمين تنسبها ليه ؟!!!
ماتقولوا عايزين منا ايه ؟؟
ان كان على البترول خدوه
هوه احنا حوشناه عنكم ؟!!!
ولا احنا عارفين خدتوا ايه وحسابنا ايه
ولا المشايخ يعرفوا أصل الحساب
حتى اسألوا شيخ العرب
قام قال آراب
أنا قلت له آراب آراب
حتى اسألوا شيخ الآراب
مابيقبضوش غير اللى بيفيض منكم
دفتر شيكات يعنى بورق
وبتبلعوا كل الحساب
يبقى بصراحة نعملو قعدة عرب
ونحققو
وانا مطرحه
ان كان فعلها اتشنق
قال لى اتفلق
بقى دولة عظمى زينا
تقعد معاك ع المصطبة
عمركش شفت الفيل يصالح أرنبة
ده حتى تبقى معيبة
لابد بن لادن يجينا لحدنا
واللى ف دماغنا نعمله
أنا قلت له :
مش مكسوفين ؟؟
بقى دولة عظمى زيكم
تحشد جيوش ؟
على فرد واحد هزكم
والبنتاجون يطلع فشوش
وتقسموا العالم معاكو وضدكم
مش مكسوفين ؟؟!!
وان فرضنا هو
لازم تداروا عجزكم
أو تختشوا على دمكم
واكفوا على الأخبار ماجور
وبلاش تثور
وتضحك العالم عليك
ان كان صحيح المسألة خالت عليك
ولو انه مش بيت القصيد
وبلاش كمان نسرح بعيد
اسمع يا بوش
بقى دولة عظمى زيكم
ماتجيبش واحد من قفاه ؟!!
ولا انتو يعنى خيال مآتة ؟
ولا انت بتفكر فى مين ؟
تكونش ناوى تدبحوا فى المسلمين
قوللى بصحيح ولا تختشيش
أنا أخوك أمين
قاللى بصراحة يا شيخ أمين
أسامة عارفين مطرحه
لكن هافتش كل بيت
فى كل دولة ضدنا
انا قلت له أحلف يمين مش عندنا
قام رد قال من غير يمين
أسامة ساكن عندكم
وف سوريا والسودان
وليبيا ولبنان
ولازم أفتش عندكم
كل المساجد والبيوت
أنا قلت له ربك كبير
ربك نصرنا من زمان بالعنكبوت
ليه الافترا
قادر يشتت شملكم
ويهدكم
ويرد كيدكو ف نحركم
اسمع يا بوش
ان كنت بتجيش جيوش
احنا بصراحة مابنخافوش
ان عشنا لازم ننتصر
وان متنا هانول الشهادة
واللى انت برضه ماتعرفوش
اقصى الأمانى عندنا
هيه الشهادة
ويا بخت من يلقى الشهادة
اقرا التاريخ
وشوف تاريخ طرد الرومان
واعرف كمان يا ألعوبان
يا أبرهة هذا الزمان
ولسه قاعد بافتكر
فى اللى جرى ولا اللى كان
صحيت على صوت الأدان
رددت وياه الأدان
الله أكبر
الله أكبر
هرب الشيطان الألعوبان
والفجر بان
والغدر بان
والفرق بان
بين أبرهة ملك اليمن
وأبرهة حاكم بلاد الأمريكان
الأولانى الطير رماه
والتانى قال :
زلة لسان
ليست هناك تعليقات:
إرسال تعليق